ЕС праводзіць вучэнні па праверцы механізмаў крызіснага кіравання ў адказ на кібер- і гібрыдныя пагрозы
Паралельныя і скаардынаваныя вучэнні - PACE 17 - пройдуць па наступным сцэнары: дзяржавы-члены ЕС і ўвесь Саюз у цэлым нібыта сутыкаюцца з гібрыднай пагрозай, і на працягу тыдня, да 4 кастрычніка, з дапамогай PACE 17 будзе праверана іх гатоўнасць рэагаваць на такія выклікі бяспецы.
Мэтай вучэнняў з'яўляецца павышэнне гатоўнасці і ацэнка эфектыўнасці інструментаў і механізмаў ЕС у выпадку магчымага нападу, а таксама распрацоўка прапаноў па паляпшэнні сітуацыі там, дзе гэта неабходна.
У перыяд з 4 па 11 кастрычніка 2017 года асобныя вучэнні па пераадоленні крызіснай сітуацыі будзе праводзіць і НАТА. Вучэнні НАТА (СМХ17) і вучэнні ЕС (РАСЕ 17) будуць праводзіцца незалежна адно ад аднаго, але паралельна і каардынавана. Каардынацыя вучэнняў будзе ажыццяўляцца штабамі ЕС і НАТА, супрацоўнікі якіх прымуць удзел у абодвух вучэннях. Гэтыя вучэнні павінны палепшыць сінхранізацыю рэагавання ЕС і НАТА на крызісныя сітуацыі.
Агульная інфармацыя
Гібрыдная пагроза, як правіла, носіць шматбаковы характар і ўключае ў сябе камбінацыю некалькіх праблем бяспекі. Гэта, напрыклад, рэзкі рост колькасці дэзінфармацыйных паведамленняў у сацыяльных сетках, кібератакі на вельмі важную інфраструктуру, узлом камп'ютэрных сістэм з наступнай уцечкай канфідэнцыяльнай інфармацыі, а таксама тэрарыстычныя атакі. За апошні год небяспека гібрыдных пагроз і кібератак для эканомікі ЕС і яго грамадзян узрасла. Таму ЕС прыняў рашэнне надаць больш увагі гэтай праблеме і павысіць сваю здольнасць рэагаваць на пагрозы такога кшталту.
Вучэнні PACE17 будуць засяроджвацца на чатырох ключавых пытаннях, а менавіта: на павышэнні дасведчанасці аб сітуацыі, праверцы эфектыўнасці інструментаў процідзеяння кіберпагрозам на ўзроўні ЕС, праверцы хуткасці рэакцыі і механізмаў рэагавання на крызісныя сітуацыі, а таксама праверцы здольнасці да хуткага і скаардынаванага абмену дадзенымі. Пасля вучэнняў будзе праведзена ацэнка вынікаў для таго, каб зрабіць правільныя высновы і ўдасканаліць існуючыя інструменты рэагавання на пагрозы такога кшталту.
Паляпшэнне сінхранізацыі рэагавання на крытычныя сітуацыі ў ЕС і НАТА з'яўляецца адным з ключавых пунктаў у прапановах абодвух бакоў для падтрымання рэалізацыі Сумеснай дэкларацыі, падпісанай у ліпені 2016 года ў Варшаве старшынёй Савета Еўропы, старшынёй Еўрапейскай камісіі і Генеральным сакратаром НАТА.