Delegacioni i BE-së ndriçohet me ngjyrë të kaltër për të shënuar Ditën Botërore të Fëmijëve ndërsa BE-ja rrit përpjekjet për të promovuar të drejtat e fëmijëve në të gjithë botën
'Ju duhet të punoni, ne të gjithë duhet të punojmë, për ta bërë botën të denjë për fëmijët e saj', u tha ambasadori i BE-së David Geer nxënësve të Maqedonisë së Veriut, ndërsa u drejtohej atyre me rastin e Ditës Botërore të Fëmijëve.
Simbolikisht, nxënësit gjithashtu këtë vit 'morën' ndërtesën e qeverisë në Shkup për të kërkuar arsim më cilësor dhe gjithëpërfshirës, për të treguar vështirësitë me të cilat përballen gjatë pandemisë dhe për të shprehur shqetësimin e tyre për ndryshimet klimatike. Nxënësit mbajtën podiumin e qeverisë ndërsa zyrtarë, përfshirë Ambasadorin Geer, morën pjesë përmes lidhjeve me video konferencë.
Ambasadori Geer deklaroi se arsimi duhet të pajisë të rinjtë me aftësitë e nevojshme për të marrë pjesë në një treg pune që ndryshon me shpejtësi duke promovuar kreativitetin dhe inovacionin dhe duke i përgatitur ata që t’u përshtaten realiteteve të reja - diçka që është një sfidë kudo në Evropë. "Por që ndonjë nga këto të funksionojë, ju, të rinjtë, duhet të jeni të kyçur që nga fillimi", nënvizoi ai.
https://twitter.com/AmbassadorEU/status/1329791999977934848
Në prag të 20 Nëntorit, data kur në vitin 1989 Asambleja e Përgjithshme e KB-së miratoi Deklaratën e të Drejtave të Fëmijëve, ndërtesa e Delegacionit u ndriçua me ngjyrë të kaltër si një gjest simbolik i angazhimit të BE-së për të përparuar të drejtat e fëmijëve.
'Ky vit ka treguar më shumë se kurrë se si krizat prishin jetën e fëmijëve, pa marrë parasysh se në cilin vend jetojnë ", thuhet në deklaratën e përbashkët nga Përfaqësuesi i Lartë i BE-së Josep Borrell dhe Komisioni Evropian për të shënuar këtë ditë. 'Pandemia e koronavirusit dhe pasojat e saj socio-ekonomike kanë një ndikim serioz dhe potencialisht afatgjatë në të mësuarit, mirëqenien, zhvillimin dhe mbrojtjen e fëmijëve', theksohet në deklaratë.
Në përgjigje të numrit në rritje të rasteve të raportuara të abuzimit seksual të fëmijëve në internet gjatë pandemisë, BE-ja miratoi në korrik 'Strategjinë e BE-së për një luftë më efektive kundër abuzimit seksual të fëmijëve'.
Për më tepër, 'Strategjia e BE-së për të drejtat e fëmijëve', që do të miratohet në pranverën e vitit 2021, "do të adresojë sfidat e dala nga pandemia, do të propozojë veprime për të forcuar pjesëmarrjen e fëmijëve, mbrojtjen dhe promovimin e të drejtave të fëmijëve në të gjitha nivelet në këtë botë të re që po ndryshon ”. Për më tepër, sipas 'Planit të Veprimit të BE-së për të Drejtat e Njeriut dhe Demokracinë 2020-2024' të sapo miratuar, BE-ja po financon veprime dhe iniciativa të shumta për promovimin, mbrojtjen dhe përmbushjen e të drejtave të fëmijëve në të gjithë botën.
