Western Balkans

Shqipëria dhe Italia - një shembull i solidaritetit evropian kundër Coronavirusit

31/03/2020 - 09:46
News stories

Më 28 mars 2020, Shqipëria dërgoi 30 mjekë dhe infermierë në Itali për të mbështetur fqinjin e saj të goditur rëndë në luftën kundër Coronavirusit.

 

Më 28 mars 2020, Shqipëria dërgoi 30 mjekë dhe infermierë në Itali për të mbështetur fqinjin e saj të goditur rëndë në luftën kundër Coronavirusit.

Ndërsa e gjithë bota, përfshirë Ballkanin Perëndimor, po përpiqet të luftojë pandeminë e Coronavirusit, Shqipëria, në një akt solidariteti dhe miqësie, vendosi të dërgojë 30 mjekë dhe infermierë në Itali, për të mbështetur fqinjin e saj në këto kohëra krize. Mjekët profesionistë shqiptarë dolën vullnetarë për të punuar në Lombardi, në zonën përreth Bergamos, rajoni më i prekur në Itali. Ata do të punojnë krah për krah me kolegët e tyre italianë për një periudhë njëmujore. Me mbi 11.500 të vdekur, Italia ka numrin më të lartë të vdekjeve të lidhura me Coronavirusin në botë deri më tani.

Ashtu si dhe vendet e tjera në Ballkanin Perëndimor, edhe Shqipëria është goditur nga epidemia e Coronavirusit me 223 raste të personave të infektuar dhe 12 të vdekur.

“Solidariteti është në zemër të vlerave të Bashkimit Evropian”, theksoi Përfaqësuesi i Lartë / Zëvendës-Presidenti Josep Borrell. Në bisedën e tij me Kryeministrin shqiptar Edi Rama, Përfaqësuesi i Lartë / Zëvendës-Presidenti Josep Borrell ra dakord mbi rëndësinë e bashkëpunimit ndërkombëtar për të luftuar përhapjen e pandemisë së Coronavirusit. “Nevojitet një veprim i fortë dhe i koordinuar për të adresuar ndikimin e kësaj pandemie në shoqëri dhe ekonomi. Prandaj, BE-ja ka ridrejtuar në Shqipëri mbi 50 milionë Euro për mbështetje të menjëhershme në sektorin e shëndetësisë dhe rimëkëmbjen socio-ekonomike të vendit," nënvizoi Josep Borrell. Për më tepër, BE-ja po siguron 38 milionë Euro ndihmë të menjëhershme për të adresuar emergjencën e lidhur me Coronavirusin në Ballkanin Perëndimor.

Të enjten, më 26 mars 2020, Këshilli Evropian dha dritën e gjelbër për të filluar negociatat e pranimit me Shqipërinë dhe Maqedoninë e Veriut, duke pranuar kështu progresin e bërë dhe reformat thelbësore të zbatuara nga të dy vendet. Përfaqësuesi i Lartë / Zëvendës-Presidenti Josep Borrell mirëpriti këtë vendim të marrë nga shtetet anëtare në mes të krizës së Coronavirusit, si një vendim të rëndësishëm për rajonin dhe mbarë Bashkimin Evropian.

Languages: