Vanuatu and the EU

Беларусь: заява Высокага прадстаўніка, Намесніка старшыні Еўрапейскай камісіі аб падтрымцы ЕС Міжнароднай платформы для Беларусі па прыцягненні вінаватых да адказнасці

Brussels, 26/03/2021 - 11:04, UNIQUE ID: 210326_6
Statements by the HR/VP

Пасля фальсіфікаваных выбараў, якія адбыліся сем месяцаў таму, беларускія ўлады здзейснілі непрымальныя парушэнні правоў чалавека ў дачыненні да народа Беларусі. Сутыкнуўшыся з масавай мірнай мабілізацыяй беларускага насельніцтва, якое выступае за дэмакратыю і свае фундаментальныя свабоды, улады адказалі гвалтоўнымі рэпрэсіямі, адвольнымі арыштамі і затрыманнямі, сотнямі дакументальна пацверджаных выпадкаў катаванняў і іншых відаў жорсткага, бесчалавечнага альбо зневажальнага для годнасці абыходжання альбо пакарання, уключаючы сексуальны і гендарны гвалт. Нічым не справакаванае, адвольнае затрыманне больш за двухсот мірных людзей па ўсёй Беларусі ўчора з нагоды Дня Волі дэманструюць, што маштабы рэпрэсій з боку дзяржавы не змяншаюцца. Вінаватыя павінны быць прыцягнуты да адказнасці.

Еўрапейскі саюз разам са сваімі міжнароднымі партнёрамі ўзначальвае барацьбу супраць беспакаранасці. Разам з групай дзяржаў-членаў ЕС і іншых краін-аднадумцаў ЕС падтрымлівае Міжнародную платформу для Беларусі па прыцягненні вінаватых да адказнасці – незалежную і непрадузятую пляцоўку для збору, праверкі і захавання дакументацыі і доказаў сур'ёзных парушэнняў правоў чалавека, учыненых у Беларусі ў час і пасля прэзідэнцкіх выбараў жніўня 2020 года. ЕС прадастаўляе гэтай Платформе палітычную, а пасля завяршэння падрыхтоўкі будзе прадастаўляць таксама і фінансавую падтрымку.

На гэтым тыдні Еўрапейскі саюз таксама паспяхова прадставіў рэзалюцыю ў Савеце ААН па правах чалавека, якая прадугледжвае стварэнне дзейснага механізму пры Упраўленні Вярхоўнага камісара ААН па правах чалавека. Гэты механізм будзе выкарыстоўваць у тым ліку і дакументацыю, атрыманую Міжнароднай платформай для Беларусі, і спрыяць прыцягненню да адказнасці вінаватых і ажыццяўленню правасуддзя для ахвяр.

ЕС будзе і надалей падтрымліваць беларускі народ у яго законным імкненні да дэмакратыі і павагі фундаментальных свабод, уключаючы права на свабоду слова, мірныя сходы і дэманстрацыі без гвалту, запалохвання і пагрозы рэпрэсій.