Mill-1 ta' Diċembru 2019 Josep Borrell Fontelles minn Spanja ħa r-rwol ta' Rappreżentant Għoli/Viċi President tal-UE. Bħala l-kap diplomatiku tal-UE huwa inkarigat mit-tfassil u t-twettiq tal-politiki tal-UE dwar l-affarijiet barranin, is-sigurtà u d-difiża - magħrufa bħala l-"Politika Estera u ta' Sigurtà Komuni" (PESK) u l-"Politika ta' Sigurtà u ta' Difiża Komuni" (PSDK).

Aqra aktar dwar il-ħidma ta' kuljum tar-Rappreżentant Għoli.

Minn mindu daħal fis-seħħ it-Trattat ta' Lisbona r-Rappreżentant Għoli huwa wkoll il-Viċi President tal-Kummissjoni Ewropea. Dan jippermetti koordinazzjoni ulterjuri u jiżgura koerenza fil-politika barranija tal-UE peress li l-Kummissjoni Ewropea għandha responsabbiltajiet internazzjonali importanti bħan-negozju, l-iżvilupp, il-politika tal-viċinat u l-għajnuna umanitarja.

Il-kombinazzjoni ta' dawn ir-rwoli hija biex tiżgura l-konsistenza u l-koerenza tal-attivitajiet tal-UE fid-dinja u biex tiżgura li ma jkunx hemm kunflitt bejniethom u lanqas duplikazzjoni.

Ir-Rappreżentant Għoli jmexxi lill-korp diplomatiku tal-UE, is-Servizz Ewropew għall-Azzjoni Esterna.

X'jagħmel ir-Rappreżentant Għoli/Viċi President?

Ir-rwol tiegħu huwa estensiv. Dan jinvolvi:

• It-tmexxija globali tal-politika barranija u l-politika ta' sigurtà f'isem l-UE;
• Il-koordinazzjoni tal-għodda tal-politika barranija tal-UE – żvilupp, negozju, politika tal-viċinat, għajnuna umanitarja u rispons għall-kriżijiet fir-rwol tiegħu bħala Viċi President tal-Kummissjoni Ewropea;
• Il-bini ta' kunsens bejn l-istati membri tal-UE u l-prijoritajiet rispettivi tagħhom, inkluż billi kull xahar jippresiedi laqgħat bejn il-ministri għall-affarijiet barranin tal-UE, il-ministri għad-difiża u l-ministri għall-kummerċ u l-iżvilupp;
• L-attendenza ta' laqgħat regolari bejn il-mexxejja tal-UE fil-Kunsill Ewropew;
• Interventi f'dibattiti fil-Parlament Ewropew dwar kwistjonijiet ta' politika barranija u ta' sigurtà;
• Ir-rappreżentanza tal-UE f'laqgħat internazzjonali, bħan-Nazzjonijiet Uniti;
• It-tmexxija tal-Aġenzija Ewropea għad-Difiża u l-Istitut tal-UE għall-Istudji fuq is-Sigurtà.

Min jaħtar ir-Rappreżentant Għoli/Viċi President?

• Il-Kunsill Ewropew, li huma magħmul mill-kapijiet ta' stat jew ta' gvern tal-istati membri kollha tal-UE, jaħtar lir-RGħ/VP permezz ta' votazzjoni "b'maġġoranza kwalifikata".
• Il-President tal-Kummissjoni jrid jaqbel mad-deċiżjoni.
• Ir-Rappreżentant Għoli għandu wkoll ir-rwol ta' Viċi President tal-Kummissjoni Ewropea li bħala korp huwa vvutat mill-Parlament Ewropew qabel ma jieħu l-kariga.
• Il-Kummissarji jinħatru għal mandat ta' ħames snin, li jista' jiġġedded u li jikkoinċidi mal-mandat ta' ħames snin tal-Kummissjoni Ewropea.