ဥေရာပသမဂၢ ျမန္မာနိဳင္ငံဆိုင္ရာသံရုံး

တစ်ကမ္ဘာလုံး ပိုမိုအနီးကပ် ကောင်းမွန်စွာ ပူးပေါင်းဆောင်ရွက်နိုင်ပါက COVID-19 ကို ပိုမိုလျင်မြန်စွာ အနိုင်ယူကျော်လွှားနိုင်ပေမည်

12/05/2020 - 11:10
Voices and views

Kristian Schmidt, မြန်မာနိုင်ငံဆိုင်ရာ ဥရောပသမဂ္ဂ သံအမတ်ကြီး

 

ကိုရိုနာနှင့် တစ်ကိုယ်ကောင်းဆန်သော အမျိုးသားရေးစိတ်ဓာတ် ဟူသည့် ဦးခေါင်းနှစ်လုံးပါသော ဗိုင်းရပ်ကို တိုက်ဖျက်ရာတွင် ပူးပေါင်းဆောင်ရွက်ကြရန် ဥရောပသမဂ္ဂ၏ ဖိတ်ခေါ်ချက်အရ ကမ္ဘာ့နိုင်ငံခေါင်းဆောင်များ၊ နိုင်ငံတကာအဖွဲ့အစည်းများနှင့် ကုမ္ပဏီများမှ ခေါင်းဆောင်ပေါင်း ၅၀ ကျော်တို့သည် မေလ ရက်နေ့တွင် ပါဝင်ခဲ့ကြပါသည်။ ရောဂါစစ်ဆေးခြင်း၊ ကုသခြင်းနှင့် အရေးကြီးဆုံးအချက်ဖြစ်သည့် ကာကွယ်ဆေးဖော်ထုတ်ခြင်းတို့အတွက် အဆိုပါ ခေါင်းဆောင်များ အားလုံး အတူတကွပူးပေါင်း၍ ယူရိုငွေ . ဘီလီယံ (မြန်မာကျပ်ငွေအားဖြင့် ၁၁.၁၃ ထရီလီယံကျော်) ကို ရင်းနှီးမြှုပ်နှံကြရန် ကတိသစ္စာပြုခဲ့ကြပါသည်။

COVID-19 ဗိုင်းရပ်သည် နိုင်ငံ နယ်နိမိတ်တစ်ခုအတွင်း၌သာ ကူးစက်ပြန့်ပွားခြင်း မဟုတ်ပါ။ ထို့ကြောင့်ပင် ဤကမ္ဘာ့ကပ်ရောဂါအား တုံ့ပြန် တိုက်ဖျက်ရာတွင်လည်း တစ်ဦးတည်းသီးသန့် ရင်ဆိုင်ခြင်းသည် ထိရောက်မည်မဟုတ်ပေ။ ဗိုင်းရပ်ကူးစက်ပျံ့နှံ့ခြင်းကို ထိန်းချုပ်၊ ကာကွယ်နိုင်ရန် လူချင်းရှောင်ခွာသည့် နည်းလမ်းကို ကျင့်သုံးလျက်ရှိကြသော်လည်း ဤဗိုင်းရပ်ကို ထိရောက်စွာ တုံ့ပြန်တိုက်ဖျက်ရန်အတွက်မူ နိုင်ငံများအနေဖြင့် ပိုမိုနီးကပ်စွာ ပူးပေါင်းကြရန် လိုအပ်ပါသည်။ စစ်မှန်သည့် ကမ္ဘာလုံးဆိုင်ရာ တုံ့ပြန်တိုက်ဖျက်ရေးဆိုသည်မှာ ကာကွယ်ဆေးထုတ်ဖော်ပြီးသည်နှင့် တစ်ပြိုင်နက် ထိပ်သီးနိုင်ငံများသာ အရင်ဆုံးလက်ခံရရှိခြင်း မဟုတ်ဘဲ နိုင်ငံများ အားလုံး လက်လှမ်းမီ ရယူနိုင်ခြင်းကို ဆိုလိုပါသည်။ ကာကွယ်ဆေးကို ကမ္ဘာ့နေရာ အနှံ့အပြားသို့ ဖြန့်ဝေနိုင်ရန်အတွက် လုံလောက်သော ထုတ်လုပ်နိုင်စွမ်းကို ရရှိရန် ယခုအချိန်ကတည်းက အတူတကွ ကြိုတင်ပြင်ဆင်ထားရန် လိုအပ်ပါသည်။ အချက်အလက်များအရ သုံးသပ်ပါက ရောဂါစစ်ဆေးရှာဖွေနိုင်စွမ်း သို့မဟုတ် နိုင်ငံတွင်းဆေးဝါးထုတ်လုပ်ရေးကဏ္ဍ တို့တွင် စွမ်းဆောင်ရည် အကန့်အသတ်ရှိနေသော မြန်မာနိုင်ငံကဲ့သို့သော နိုင်ငံများသည် ကာကွယ်ဆေးကို ပထမဆုံးလက်ခံရရှိသည့်နိုင်ငံများတွင် ပါဝင်သင့်ပါသည်။

ကိုဗစ်-၁၉ ကြောင့် လူ့အသက်များနှင့် အလုပ်အကိုင်များ ဆုံးရှုံးခြင်း၊ ချစ်ခင်ရသူများနှင့် ဝေးကွာခြင်း၊ မိမိတို့နေအိမ်တွင်း၌သာ နေထိုင်ရခြင်း၊ ကျွန်ုပ်တို့၏ ကမ္ဘာကြီးအား ဗြောင်းဆန်သွားစေခြင်း စသည်တို့ ဖြစ်ပွားခဲ့ပြီး ထိုအချင်းအရာများကို ကျွန်ုပ်တို့အားလုံး တွေ့ကြုံခံစားနေကြရခြင်း ဖြစ်ပါသည်။ ဝူဟန်မြို့မှ ဆရာဝန်များသည် ၎င်းတို့၏ စိုးရိမ်ပူပန်မှုများအကြောင်း ထုတ်ဖော်ပြောကြားခဲ့စဉ်တွင် တရုတ်နိုင်ငံ အာဏာပိုင်များအနေဖြင့် ၎င်းတို့အား တားမြစ်ပိတ်ပင်ခြင်းပြုမည့်အစား ပိုမိုပွင့်လင်းမြင်သာစွာဖြင့် တုံ့ပြန်ဖြေရှင်းရန် ဖြစ်နိုင်ခဲ့ပါသလားဟု နည်းလမ်းတကျ မေးမြန်းဆွေးနွေးမှုများ ရှိနေပါသည်။ သို့ရာတွင် ယခုအချိန်သည် လက်ညှိုးထိုးအပြစ်တင်ခြင်း၊ ခွဲခြားဆက်ဆံခြင်း၊ မမှန်သတင်းများ သို့မဟုတ် မှန်းဆထင်မြင်မှုများဖြင့် ဝေဝါးစွာ စွပ်စွဲပြောဆိုခြင်း၊ လူမျိုးရေးအရ သို့မဟုတ် နိုင်ငံသားဖြစ်မှုအပေါ် ရှုတ်ချဝေဖန်ခြင်းများ ပြုရမည့်အချိန် မဟုတ်ပါ။ ကိုရိုနာဗိုင်းရပ်၏ ဇာစ်မြစ်ကို ရှာဖွေကာ ထိရောက်စွာ တုံ့ပြန်တိုက်ဖျက်၍ ပုံမှန်ဘဝသို့ တတ်နိုင်သမျှလျင်မြန်စွာ ပြန်လည်ရောက်ရှိနိုင်ရေးအပေါ် အာရုံစိုက်လုပ်ဆောင်နိုင်ရန်အတွက် တစ်ကမ္ဘာလုံးသည် နိုင်ငံရေးအရမဟုတ်ဘဲ သိပ္ပံပညာအားဖြင့် ပူးပေါင်းဆောင်ရွက်ကြရန် လိုအပ်ပါသည်။ မေလ ၁၈ ရက်နေ့တွင် ကျင်းပမည့် ကမ္ဘာ့ကျန်းမာရေးအဖွဲ့၏ နှစ်စဉ် ကမ္ဘာ့ကျန်းမာရေးညီလာခံတွင် ဥရောပသမဂ္ဂသည် ဤကမ္ဘာ့ကပ်ရောဂါ၏ ဇာစ်မြစ်ကို ရှာဖွေရန်အတွက် သီးခြားစုံစမ်းစစ်ဆေးမှုတစ်ရပ်ကို ပြုလုပ်ရန် အဆိုတင်သွင်းသွားမည် ဖြစ်ပါသည်။

ဥရောပဒေသသည် ကိုရိုနာဗိုင်းရပ်၏ ရိုက်ခတ်မှုဒဏ်ကို အလူးအလဲခံစားခဲ့ရပါသည်။ ယခုအချိန်အထိ လူပေါင်း . သန်းနီးပါး ကူးစက်ခံထားရပြီး ကိုဗစ်-၁၉ ကမ္ဘာ့ကပ်ရောဂါကြောင့် သေဆုံးမှုပေါင်း ၁၄၅,၀၀၀ ခန့် ရှိသည်ဟု ကျန်းမာရေးအာဏာပိုင်များက ထုတ်ပြန်ထားပါသည်။ သန်းနှင့်ချီသော ဥရောပသားများသည် မိမိနေအိမ်တွင်း၌သာ ရက်သတ္တပတ်ပေါင်းများစွာ နေထိုင်ခဲ့ရပြီး ကျောင်းပေါင်းများစွာမှာလည်း ဆက်လက် ပိတ်ထားလျက်ရှိပါသည်။ ဥရောပတစ်ခွင်တွင် နေ့စဉ်လုပ်ငန်းလည်ပတ်မှုများ ရပ်ဆိုင်းသွားသောကြောင့် မြန်မာနိုင်ငံတွင် ဖြစ်ပေါ်နေသကဲ့သို့ပင် သန်းနှင့်ချီသော ဥရောပသားများသည် ၎င်းတို့၏ ဝင်ငွေ၊ အလုပ်အကိုင်များနှင့် အသက်မွေးမှုများစွာကို ဆုံးရှုံးခဲ့ရပြီး ဥရောပတစ်ဝန်းရှိ လမ်းများစွာလည်း တိတ်ဆိတ်လျက်သား ရှိနေပါသည်။ ဥရောပဒေသသည် ဗိုင်းရပ်ဒဏ်ကို အလူးအလဲ ခံစားနေရသော်လည်း မိမိခြေပေါ်တွင် ရပ်တည်မြဲပင်ဖြစ်ကာ ဥရောပဒေသတွင်းနှင့် ကမ္ဘာတစ်ဝန်းရှိ မိတ်ဖက်နိုင်ငံများအပေါ် ထားရှိသော ဥရောပသားတို့၏ စည်းလုံးညီညွတ်မှုစိတ်ဓာတ်ကိုလည်း အသုံးချလျက်ရှိပါသည်။

အထူးသဖြင့် ဝေးလံခေါင်သီဒေသများတွင် အရင်းအမြစ် အကန့်အသတ်ရှိပြီး အဓိကလိုအပ်သော ဆေးဘက်သုံးထောက်ပံ့ရေးပစ္စည်းများ ချို့တဲ့သော်လည်း ကိုရိုနာဗိုင်းရပ်အား တုံ့ပြန်ရင်ဆိုင်ရာတွင် လေးစားအားကျဖွယ် တည်ငြိမ်မှုနှင့် ပညာရှင်ဆန်မှုတို့ဖြင့် ပါဝင်လှုပ်ရှားလျက်ရှိသော မြန်မာနိုင်ငံအစိုးရကိုလည်း ဂုဏ်ပြုလိုပါသည်။ မြန်မာနိုင်ငံတွင် အတည်ပြုပိုးတွေ့လူနာ အရေအတွက် နည်းပါးသည်မှာ ရောဂါစစ်ဆေးရှာဖွေမှုပြုလုပ်သည့် အရေအတွက် နည်းပါးခြင်းနှင့် တစ်စိတ်တစ်ပိုင်း သက်ဆိုင်နိုင်သော်လည်း ယေဘုယျအားဖြင့်မူ မြန်မာနိုင်ငံသည် အရင်းအမြစ် များပြားစွာရှိသော ဖွံ့ဖြိုးပြီးနိုင်ငံများစွာထက် ပိုမိုကောင်းမွန်သည့်ရလဒ်ကို ရရှိခဲ့ပါသည်။

သို့ရာတွင် ဤကဲ့သို့ တင်းကျပ်စွာထိန်းချုပ်သည့် နည်းလမ်းများအတွက် ပြန်လည်ပေးဆပ်ရသည့် အဖိုးအခရှိပြီး မြန်မာနိုင်ငံပြည်သူများနှင့် စီးပွားရေးအပေါ် ရိုက်ခတ်သော လူမှု-စီးပွားဆိုင်ရာ ဂယက်မှာ အလွန်ပြင်းထန်ပါသည်။ ဤနှစ်အတွက် စီးပွားရေးတိုးတက်မှုသည် ထက်ဝက်ခန့် လျော့ကျသွားနိုင်ခြင်း သို့မဟုတ် ထိုထက်ပင် ဆိုးရွားနိုင်ပါသည်။ ဥရောပသမဂ္ဂသည် မြန်မာနိုင်ငံနှင့် စည်းလုံးညီညွတ်စွာ ရပ်တည်လျက်ရှိပြီး လူအများအား ဗိုင်းရပ်ကူးစက်ပြန့်ပွားခြင်းကို ထိန်းချုပ်ကာကွယ်ခြင်းနှင့် ကျန်းမာ၍ ဘေးကင်းလုံခြုံစွာ နေထိုင်ခြင်းတို့အကြောင်း အသိပညာပေးရာတွင် အစိုးရကို နိုင်ငံတစ်ဝန်းတွင် လုပ်ဆောင်လျက်ရှိသည့် ကျွန်ုပ်တို့၏ များစွာသော အစီအစဉ်များမှတစ်ဆင့် အကူအညီပေးကာ စည်းလုံးညီညွတ်ခြင်းကို လက်တွေ့ဆန်သည့် နည်းလမ်းများဖြင့် ပြသခဲ့ပြီး ဖြစ်ပါသည်။ ကျွန်ုပ်တို့၏ စီမံကိန်းများသည် နိုင်ငံတစ်ဝန်းရှိ လူမှုအသိုက်အဝန်းများ၊ အစိုးရအရာရှိများနှင့် ကျန်းမာရေးလုပ်သားများအတွက် မရှိမဖြစ်လိုအပ်သော ကျန်းမာရေးနှင့် တစ်ကိုယ်ရည် ကာကွယ်ရေးကိရိယာများကိုလည်း ပံ့ပိုးပေးခဲ့ပါသည်။

ပြည်တွင်းနေရပ်စွန့်ခွာထွက်ပြေးသူများနှင့် ပဋိပက္ခဒဏ်သင့်ပြည်သူများ အပါအဝင် ထိခိုက် အလွယ်ဆုံးသောသူများထံ လူသားချင်းစာနာထောက်ထားမှုအကူအညီများ ဆက်လက်ပေးအပ် နိုင်ရန်အတွက် အထူးကြိုးပမ်းအားထုတ်လျက်ရှိပါသည်။ ဤအကျပ်အတည်းကာလတွင် အစိုးရဝင်ငွေများ ကျဆင်းလျက်ရှိသည်နှင့်အညီ ကျွန်ုပ်တို့သည် ပညာရေးကဏ္ဍကို ဆက်လက်ထိန်းသိမ်းရန်အတွက် ပညာရေးဝန်ကြီးဌာနအား ရန်ပုံငွေထောက်ပံ့ခြင်းကို အရှိန်မြှင့်လုပ်ဆောင်လျက်ရှိပါသည်။ မြန်မာနိုင်ငံ၏ ကိုဗစ်-၁၉ တုံ့ပြန်တိုက်ဖျက်ရေးတွင် အဓိကကျသည့်နေရာမှ ပါဝင်သည့် အမျိုးသားကျန်းမာရေး ဓာတ်ခွဲမှုဆိုင်ရာဌာနသည် ၎င်း၏ ရောဂါစစ်ဆေးရှာဖွေနိုင်စွမ်းနှင့် ဤကပ်ရောဂါနှင့် နောင်ဖြစ်ပေါ်လာမည့် ကပ်ရောဂါများအတွက် ကြိုတင်ပြင်ဆင်ထားနိုင်စွမ်းကို မြှင့်တင်ရန်အတွက် ဥရောပသမဂ္ဂနှင့် ပြင်သစ်ဖွံ့ဖြိုးတိုးတက်ရေး အေဂျင်စီတို့၏ ပူးတွဲထောက်ပံ့မှုကို လက်ခံရရှိနေပြီဖြစ်ပါသည်။

အထည်ချုပ်လုပ်ငန်းကဏ္ဍမှ အမျိုးသမီးများအား ထောက်ပံ့ကူညီခြင်းသည် ကျွန်ုပ်နှင့် ဥရောပသမဂ္ဂအတွက် အထူးထိပ်တန်းဦးစားပေး ဖြစ်ပါသည်။ အလုပ်အကိုင်ပေါင်း သောင်းနှင့်ချီကာ ဆုံးရှုံးခဲ့ကြရပြီးဖြစ်ကာ ဤထက် ပိုမိုဆုံးရှုံးနိုင်ခြေ ရှိနေပါသည်။ ဤဖြစ်ရပ်၏ အကြောင်းရင်းများမှာ ပထမဆုံး တရုတ်နိုင်ငံမှ ကုန်ကြမ်းရရှိမှု ပြတ်တောက်ကာ ထို့နောက်တွင် ကမ္ဘာတစ်ဝန်းရှိ ဝယ်လက်များမှ ကုန်အမှာစာများကို ပယ်ဖျက်ခဲ့ပြီး ယခုအချိန်တွင် အသွားအလာကန့်သတ်ထားမှုများ ရှိနေသည့်အတွက် စက်ရုံများ ပိတ်ထားရသောကြောင့် ဖြစ်ပါသည်။ ဤအမျိုးသမီးများသည် ဤဆင်းရဲဒုက္ခများကို ခံစားသင့်သည့် အကြောင်းမရှိပါ။ ဤလုပ်သားအများစုသည် အိမ်တွင်ရှိသော ၎င်းတို့၏ကလေးများနှင့် မိသားစုများကို မိမိတို့၏လုပ်ခလစာဖြင့် ထောက်ပံ့နေကြသော မြန်မာနိုင်ငံတစ်ဝန်းမှ အမျိုးသမီးငယ်များ ဖြစ်ကြပါသည်။ ဥရောပသမဂ္ဂ၏ GSP ကြောင့် ဥရောပသမဂ္ဂဈေးကွက်သို့ ဝင်ရောက်နိုင်ခဲ့သဖြင့် အလုပ်အကိုင်ပေါင်း ၅၀၀,၀၀ ကို ဖန်တီးပေးနိုင်ခဲ့ကာ အောင်မြင်မှုရရှိခဲ့သော ဤဖြစ်ရပ်ကို ဆက်လက် ထိန်းသိမ်းထားရမည် ဖြစ်ပါသည်။ အကျပ်အတည်းကြုံလာချိန်တွင် လုပ်သားများအနေဖြင့် ဤခက်ခဲသောအခြေအနေကို ဖြတ်သန်းရာ၌ ကူညီနိုင်ရန်အတွက် ဥရောပသမဂ္ဂသည် မြန်ကူအရေးပေါ်ငွေသားရန်ပုံငွေကို ထူထောင်ပြီး လုပ်သားပေါင်း ၉၀,၀၀၀ အထိကို ငွေသားလွှဲပြောင်းကူညီပေးနိုင်ရန် အလျင်အမြန် စီစဉ်ဆောင်ရွက်နိုင်ခဲ့သည့်အတွက် ဝမ်းမြောက်မိပါသည်။

ကမ္ဘာကြီးသည် ကိုဗစ်-၁၉ ကို အောင်မြင်စွာကျော်လွှားနိုင်မည် ဖြစ်ပါသည်။ ပိုမိုနီးကပ်စွာ ပူးပေါင်းဆောင်ရွက်လေလေ၊ ပိုမိုလျင်မြန်စွာ ကျော်လွှားနိုင်လေလေ ဖြစ်ပါသည်။ သို့ရာတွင် ကျွန်ုပ်တို့သည် သင်ခန်းစာယူနိုင်မည်ဖြစ်ပါသလား။ ကျွန်ုပ်တို့၏ပုံမှန်ပြန်ဖြစ်ရန် ရည်မှန်းချက် မထားသင့်ပါ။ ဤကပ်ရောဂါသည် တစ်ကမ္ဘာလုံးကို လှုပ်နှိုး၍ အကြောင်းအချက်များစွာကို အသိပေးလိုက်ခြင်းပင် ဖြစ်ပါသည် - ပထမဆုံးအချက်မှာ ကျွန်ုပ်တို့သည် ကမ္ဘာ့ကျန်းမာရေးအဖွဲ့ သို့မဟုတ် ကုလသမဂ္ဂကဲ့သို့သော အဓိကအရေးပါသည့် နိုင်ငံတကာအဖွဲ့အစည်းများကို အင်အားနည်းပါးစေရန် သို့မဟုတ် နိုင်ငံရေးအရ ချုပ်ကိုင်ရန် မစွမ်းသာပါ။ ဒုတိယအချက်မှာ ကိုဗစ်-၁၉ ရောဂါ (တိရစ္ဆာန်မှ လူသို့ ကူးစက်တတ်သော ဗိုင်းရပ်ကြောင့်ဖြစ်သည့် ရောဂါ) ဇစ်မြစ် တိရစ္ဆာန်ကို ရှာဖွေတွေ့ရှိအတည်ပြုနိုင်ခဲ့ပါက ယခုလက်ရှိ တရုတ်နိုင်ငံဈေးကွက်သို့ ရောင်းချနေသော မြန်မာနိုင်ငံ၏ နယ်စပ်ဒေသများတွင် တောရိုင်းတိရစ္ဆာန် တရားမဝင်ရောင်းဝယ်ဖောက်ကားခြင်းကို တားမြစ်ရန်အတွက် အတူတကွ ဖိဖိစီးစီး စုပေါင်းလုပ်ဆောင်ရမည် ဖြစ်ပါသည်။

တတိယအချက်မှာ ဗိုင်းရပ်ပိုးဟူသည်သဘာဝတရား၏ လက်စားချေတုံ့ပြန်မှုမဟုတ်ပါ။ မိမိတို့၏ လုပ်ရပ်များကြောင့် ထွက်ပေါ်လာခြင်းဖြစ်ကာ ကမ္ဘာကြီးအပေါ် လေးစားမှုထား၍ ပြုမူလုပ်ဆောင်ကြရန် အလေးအနက် ပြန်လည်စဉ်းစားဆင်ခြင်ကြသင့်ပါသည်။ ကျွန်ုပ်တို့သည် အရင်းအမြစ်များကို မျှမျှတတချင့်ချိန်အသုံးပြုပြီး ကမ္ဘာပေါ်တွင်ရှိသော ဇီဝမျိုးကွဲများကို ကာကွယ်ထိန်းသိမ်းသည့် သန့်ရှင်းသော ရေရှည်တည်တံ့နိုင်သည့် ခေတ်သစ်စီးပွားရေးစနစ်သို့ ခုန်ပျံကူးပြောင်းရန် လိုအပ်ပါသည်။ ကျွန်ုပ်တို့၏ အသစ်သော ပုံမှန်ဖြစ်မှုသည် ကျွန်ုပ်တို့၏ အနာဂတ်အသက်မွေးမှုများနှင့် ဂြိုဟ်ကမ္ဘာကို ကာကွယ်နိုင်စွမ်းရှိပြီး ရာသီဥတုပြောင်းလဲမှုကို တားဆီးရန် ဆုံးဖြတ်ချက်ချမှတ်ရာတွင် အလျှော့ပေးညှိနှိုင်းခြင်းမပြုသည့် သဘာဝပတ်ဝန်းကျင်ကို မထိခိုက်စေသော ပုံမှန်ဖြစ်မှုသို့ ပြောင်းလဲလာရမည် ဖြစ်ပါသည်။

စတုတ္ထအချက်သည် ဤရောဂါကို ဖြစ်ပေါ်စေသည်မှာ နိုင်ငံတကာကုန်သွယ်မှုနှင့် ကူးသန်းသွားလာမှု မဟုတ်ပါ။ သို့ရာတွင် နိုင်ငံတကာစံနှုန်းများနှင့် စံအဆင့်သတ်မှတ်ချက်များသည် လိုအပ်၍ရှိနေခြင်းဖြစ်ပြီး လိုက်နာကျင့်သုံးရမည်ဖြစ်ကြောင်း ဤကမ္ဘာ့ကပ်ရောဂါက သတိပေးလျက်ရှိပါသည်။

ပဥ္စမအချက်မှာ ဤအကျပ်အတည်းသည် ဆင်းရဲနွမ်းပါးသူများနှင့် ထိခိုက်လွယ်သောသူများကို အချိုးအဆမတန် ထိခိုက်နစ်နာစေခဲ့သော်လည်း ဤရောဂါကြောင့်ပင် ကျွန်ုပ်တို့သည် အပြန်အလှန် မှီခိုအားထားနေရကြောင်းနှင့် မည်သည့်လူ့အဖွဲ့အစည်းမှ အဖွဲ့အစည်းတွင်းမှ အင်အား အနည်းဆုံးသူထက် သာလွန်၍အင်အားမကြီးနိုင်ကြောင်းကို မျက်ဝါးထင်ထင် တွေ့မြင်ခဲ့ ကြရပါသည်။ ကာကွယ်စောင့်ရှောက်မှုပေးခြင်းကို အရေးပေါ်အခြေအနေအတွင်း တုံ့ပြန်ဆောင်ရွက်ချက်တစ်ခုအနေဖြင့်သာ မဟုတ်ဘဲ အမြဲကျင့်သုံးသည့် လူ့အဖွဲ့အစည်းများ ဖြစ်ပေါ်လာရန် လိုအပ်ပြီး နိုင်ငံတကာအသိုင်းအဝိုင်းတွင်လည်း ဤနည်းအတိုင်းပင် ဖြစ်လာရန် လိုအပ်ပါသည်။

မေလ ၉ ရက်နေ့သည် ဥရောပနေ့ဖြစ်ပြီး နှင့် Schuman ကြေညာချက် နှစ် ၇၀ ပြည့်နေ့လည်း ဖြစ်ပါသည် ၁၉၅၀ ပြည့်နှစ်တွင် ပြင်သစ်နိုင်ငံခြားရေးဝန်ကြီးဟောင်း Robert Schuman က ၎င်း၏ အားကောင်း ထိရောက်သော မိန့်ခွန်းတွင် ပေါင်းစည်းမှုနှင့် စည်းလုံးညီညွတ်မှုတို့အပေါ် အခြေခံတည်ဆောက်ထားသော ငြိမ်းချမ်း၍ စီးပွားရေးဖြစ်ထွန်းအောင်မြင်သည့် ဥရောပဒေသ ဖြစ်လာစေရန် မျှော်မှန်းချက်ကို ချပြခဲ့ပါသည်။ ကိုရိုနာဗိုင်းရပ်အကျပ်အတည်းနှင့် ကြုံတွေ့ရင်ဆိုင်နေရသော ကာလတွင် ဤစကားလုံးများမှာ အလွန်ပင် မှန်ကန်ပါသည်။ ကျွန်ုပ်တို့သည် အတူတကွပေါင်းစည်းခြင်းဖြင့် ပိုမို အင်အားတောင့်တင်းပါသည်။

Languages:
Editorial Sections: