Delegation of the European Union to Iceland

၂၀၂၀ Schuman နေ့ - ဥရောပအတွေးအခေါ်အပါ် ပုဂ္ဂလအမြင်ဖြင့် သုံးသပ်ခြင်း

08/05/2020 - 19:55
From the blog

မေလ၉ရက်နေ့တွင် ကျွန်ုပ်တို့ ဥရောပနေ့ကို ဂုဏ်ပြုကြိုဆိုကြပါသည်။ Schuman ကြေညာချက် နှစ် ၇၀ပြည့် အထိမ်းအမှတ်သည် ဥရောပနိုင်ငံများပေါင်းစည်းရသည့် ရည်ရွယ်ချက်နှင့် ကမ္ဘာ့အလယ်တွင် အီးယူ၏ အခန်းကဏ္ဍမည်သို့ရှိသည်ကို ပြန်လည်သုံးသပ်နိုင်ရန် အခွင့်ကောင်းတစ်ခုပင်ဖြစ်သည်။ ကျွန်ုပ်အနေနှင့် ဥရောပအား အတွေးအခေါ်အယူအဆအနေနှင့်သာမက နိုင်ငံရေးလုပ်ငန်းစဉ်တစ်ခုအရပါ အဘယ်ကြောင့် ကာကွယ်သင့်သည်ဆိုသည်ကို ပုဂ္ဂိုလ်ရေးအမြင်ရှုထောင့်သက်သက်ဖြင့် ဤ ဘလော့ဂ်ပို့စ်မှ တစ်ဆင့် တင်ပြလိုပါသည်။

 

အခြားသူများကဲ့သို့ပင် ကျွန်ုပ်ဖြတ်သန်းခဲ့ရသော ဘဝခရီးလမ်းသည် ကျွန်ုပ်၏ နိုင်ငံရေးခံယူချက်အပေါ်လွှမ်းမိုးခဲ့ပါသည်။

ဥရောပ အတွေးအခေါ်အပေါ် ကျွန်ုပ်အနေနှင့် မိမိကိုယ်တိုင်ယုံကြည်မှုအရရော လုပ်ငန်းသဘောအရပါ စိတ်ပါဝင်စားပြီး တစ်စိုက်မတ်မတ်နှစ်မြှုပ်လာခဲ့သည်မှာ ဖရန်ကိုအုပ်ချုပ်စဉ် ကျွန်ုပ် ၁၇နှစ်အရွယ်တွင်  ထိုစဉ်က “ဥရောပဘုံဈေးကွက်” ဟုခေါ်သော နေရာသို့ စပိန်အနေနှင့် ဆက်ခံနိုင်မည့် အလားအလာအပေါ် ရေးသားထားသည့် စာတမ်းတိုကြောင့် အသက် ၁၇နှစ် အရွယ်တွင် ပညာတော်သင်ဆုရခဲ့သည့် အချိန်ကတည်းကပင်ဖြစ်သည်။ စပိန်နိုင်ငံတွင် စစ်အာဏာရှင်အုပ်ချုပ်မှုအောက်နေရသော ကျွန်ုပ်နှင့် ကျွန်ုပ်တို့ခေတ်မျိုးဆက်များအတွက်မူ ဥရောပသည် မျှော်လင့်ချက်၊ တိုးတက်မှု၊ ဒီမိုကရေစီ၊ လွတ်လပ်မှုနှင့် စည်းလုံးမှုတို့၏ သင်္ကေတဖြစ်ခဲ့သည်။

ကျွန်ုပ်နိုင်ငံ၏ နယ်စပ်ကိုဖြတ်ကျော်လာချိန်တွင် ပထမဆုံး ကြုံတွေ့ရသည့်အရာမှာ ဒိန်းမတ်နိုင်ငံရှိ စိုက်ခင်းများ၊ ဂျာမနီနိုင်ငံရှိ ဆောက်လုပ်ရေးဆိုက်များ၊ ဗြိတိန်နိုင်ငံရှိ ဧည့်ခံကြိုဆိုရေးလုပ်ငန်းများ၊ ပြင်သစ်တွင် စပျစ်သီးခူးခြင်းကဲ့သို့သော ကျောင်းသားများအတွက် နွေရာသီတွင် ဝင်ရောက်လုပ်ကိုင်နိုင်သော အလုပ်အကိုင်များပင်ဖြစ်သည်၊ ယခင်က ထိုမျှလောက်မလွယ်ခဲ့သော်လည်း နောက်ပိုင်းတွင် တစ်ဖြည်းဖြည်းလွယ်ကူလာပါသည်။ ဥရောပတစ်ခွင် ခရီးထွက်ခြင်းဖြင့် ကျွန်ုပ်အနေနှင့် အမြင်သစ်များ၊ လွတ်လပ်မှုအသစ်များနှင့် အခွင့်အလမ်းအသစ်များ ရလာပါသည်။

မက်ဒရစ် ဘက်စုံသက်မွေးပညာသင်ကျောင်းတွင် ပညာသင်ပြီးချိန် ၁၉၆၉ နွေရာသီကာလတွင် ကျွန်ုပ်အနေနှင့် ကစ်ဘ်ဘုတ်ဇ် အရပ်ဘက်တွင် အလုပ်လုပ်ခဲ့ပြီး အစ္စရေးတစ်ခွင်နှင့် ပါလက်စတိုင်းဘက်မှ ပါထားသော နယ်မြေအပိုင်းများတွင် ဂိုလန်ကုန်းမြင့်များမှ ဧလိယက်ဘက်အထိ အနှံ့ခရီး ထွက်ခဲ့သည်။ ထိုစဉ်တွင် ကျွန်ုပ်အနေနှင့် အစ္စရေး-ပါလက်စတိုင်း ပဋိပက္ခနှင့် ပထမဆုံးအကြိမ်ထိတွေ့မိခြင်းပင်ဖြစ်သည်။ ထိုဖြစ်ရပ်သည် လူ့သမိုင်းတွင် ဖြစ်တတ်သော ဝမ်းနည်းဖွယ်သဘာဝကို သတိပေးနေသကဲ့သို့ဖြစ်နေပြီး ကျွန်ုပ်တို့အနေနှင့် သမိုင်းမှ ရုန်းထွက်ရန်လိုအပ်ပါသည်။ ထိုအပိုင်းသည်ပင်လျှင် ကျွန်ုပ်တို့ ဥရောပသားများအား တွန်းအားပေးခဲ့သော အရာများ၏ တစ်စိတ်တစ်ပိုင်းဖြစ်ပါသည်။

ဥရောပသမိုင်းထဲတွင် နယ်နမိတ်ကြောင့် တိုက်ပွဲများဖြစ်ရခြင်းလည်း အပါအဝင်ဖြစ်သည်။ ထိုသို့သော တိုက်ပွဲများကြောင့် လူသန်းနှင့်ချီ၍ သေဆုံးခဲ့ရသည်။ ထို့ကြောင့် နယ်နမိတ်များသည် သမိုင်း၏ အမာရွတ်များပင်ဖြစ်သည်။ ဥရောပနိုင်ငံများပေါင်းစည်းခြင်း၏ ကောင်းမွန်သောအချက်မှာ မည်သည့်နေရာတွင် နယ်နမိတ်မျဉ်းဆွဲမည်ဟူသော အချက်ကြောင့် တိုက်ခိုက်သတ်ဖြတ်နေရခြင်းကို ရပ်တန့်၍ ထိုနယ်မြေသတ်မှတ်ချက်မျဉ်းများကို အသုံးမဝင်ရေးအပေါ်အဓိအသားပေးခြင်းပင်ဖြစ်သည်။ အမှန်တစ်ကယ်တွင် အီးယူသည် နယ်စည်းများကို ပယ်ဖျက်ရာတွင် ကမ္ဘာ့ထိပ်တန်းဖြစ်သည်။ ကံအကြောင်းမလှစွာပင် ယနေ့ခေတ်တွင် ဘာလင်တံတိုင်းပြိုကျခဲ့သည့်ခေတ်ကထက် ပိုမိကျယ်ပြောလှသော ကမ္ဘာပေါ်တွင် တံတိုင်းများ ထပ်မံပေါ်ပေါက်ရန်အတွက် နည်းလမ်းများ ပေါ်လာပြန်လေသည်။

လက်ရှိဥရောပတွင် နေထိုင်နေစဉ်အတွင်း နယ်နမိတ်စည်းများ ပြန်လည်၍ ခေါင်းထောင်ထလာသည်ကို မြင်ရသည်မှာ အင်မတန်မှ စိတ်ထိခိုက် ကြေကွဲဖွယ်ကောင်းလှပြီး လူအများအား ပိတ်ထားသည်မှာ တစ်လကျော်ပြီဖြစ်သည်။ ထိုကဲ့သို့လုပ်ရသည်မှာ မလုပ်မဖြစ်သော အကြောင်းပြချက်များ ရှိခဲ့၊ ရှိနေသောကြောင့် ဆိုသည်မှာ မှန်သော်လည်း အခွင့်သာသည်နှင့် ဥရောပတစ်ခွင်ပြန်လည်ခရီးထွက်ရန်အတွက် နယ်ခြားစည်းများ ပြန်လည်ဖွင့်ပေးရန်အတွက် တောင့်တမိပါသည်။

Schuman ကြေညာချက် နှစ် ၇၀ပြည့် အထိမ်းအမှတ်နေ့သည် ငြိမ်းချမ်းရေးနှင့် ဒီမိုကရေစီ၊ ကျော်လွန်ခမ်းနားသော သမိုင်း၊ နိုင်ငံတကာစည်းလုံးညီညွတ်ရေး၊ နယ်ခြားစည်းမရှိခြင်းဟူသော ဥရောပ၏ ပထမဦးဆုံးသော ဥပဒေသကို ပြန်လည်ဆင်ခြင်ရန် အချိန်ပင်ဖြစ်သည်။ ကျွန်ုပ်တို့ ကြီးကြီးတွေး၍ မြင့်မြင့်ကျင့်ကြံရန်လိုပါသည်။ Schuman အနေနှင့် သူ၏ ကြေညာချက်ထဲတွင် အောက်ပါအတိုင်း ပြောကြားထားသကဲ့သို့ပင် :

"ကမ္ဘာ့ငြိမ်းချမ်းရေးကို ခြိမ်းခြောက်နေတဲ့အရာတွေနဲ့ ပမာဏချင်းတူတဲ့ နည်းလမ်းအသစ်တွေ အားထုတ်ကြိုးပမ်းခြင်းမရှိဘဲ ငြိမ်းချမ်းရေးကို ကာကွယ်ဖို့ မဖြစ်နိုင်”

Schuman သည် ခပ်နုံ့နုံ့တွေးခဲ့ခြင်းမဟုတ်ပေ။ သူသည်ကျမ်းဟောင်းကြီးသမားလည်းမဟုတ်ချေ။ သူအစပြုခဲ့သော လုပ်ငန်းသည်လည်း အံ့ဩဖွယ်ကောင်းလောက်ပင် အောင်မြင်ခဲ့ပါသည်။ ထိုလုပ်ငန်းကြောင့် ချုံးချုံးကျနေခဲ့သော ဥရောပအား မိမိကိုယ်ကို ပြန်ယုံကြည်မှုရှိစေခဲ့ပြီး ပြန်လည်နိုးထစေနိုင်ခဲ့သည်။ အဖွဲ့ဝင် ၆နိုင်ငံမှ ၁၂နိုင်ငံ၊ ထိုမှတစ်ဆင့် ၁၅ မှ ယနေ့ ၂၇အထိ တိုးပွားလာခဲ့ပြီဖြစ်သည်။ ကျောက်မီးသွေးနှင့် သံမဏိ အတူတကွ ပေါင်းလုပ်ရာမှ ဘုံဈေးကွက်အထိ ပထဝီဝင်နိုင်ငံအရေးလုပ်ရှားသူစစ်စစ်ဖြစ်ရေး ရည်မှန်းချက်နှင့် နိုင်ငံရေးသမဂ္ဂဖွဲ့စည်းသည်အထိ ဖြစ်လာခဲ့ပြီဖြစ်သည်။

ဝေဖန်စရာအကြောင်းပြချက်များ အများအပြားရှိသည်ဆိုသည့် အချက်မှာလည်း မှန်ပါသည်။ ကျွန်ုပ်တို့အနေနှင့် စည်းလုံးညီညွတ်မှုဆိုသည်မှာ အပြောသက်သက်မဟုတ်ဘဲ အမှန်တစ်ကယ်ကာကွယ်မှုပေးသော ဥရောပကို လေးနက်စွာရည်ညွှန်းနေခြင်းဖြစ်ကြောင်း သက်သေပြရမည်ဖြစ်သည်။ အစိုးရ၏ ပထမဆုံးသော တာဝန်မှာ ကာကွယ်စောင့်ရှောက်ရန်ဖြစ်ပြီး အီးယူအနေနှင့် ကိုရိုနာဗိုင်းရပ်စ်ကို တွန်းလှန်ရေးနှင့် ပြန်လည်ထူတောင်ရေးတွင် ဗဟိုချက်မဖြစ်ရမည်ဖြစ်သည်။ တာထွက်မကောင်းခဲ့လှသော်လည်း ယခုအချိန်တွင် အီးယူသည် ရှေ့တန်းမျက်နှာပြင်များအားလုံးတွင် အသင့်ပြင်ဆင်ပြီးဖြစ်သည်[ကိုရိုနာမာရသွန်ဘလော့ဂ်လင့်ခ်] ဤဘေးကြီးပြီးသည်အချိန်အထိ ဥရောပစံနှုန်းများအား ပြည်သူများမှ “ဥရောပသမဂ္ဂကငါ့ကို အကာအကွယ်ရောပေးခဲ့လား” ဟူသော မေးခွန်းအား ၎င်းတို့၏ အဖြေများဖြင့် တိုက်ဆိုင်ဆုံးဖြတ်မည်ဖြစ်သည်။

အဓိကအားဖြင့် ဥရောပအနေနှင့် တစ်ပြိုင်တည်းဖြစ်ပေါ်နေသော အခက်အခဲသုံးခုကို ဖြေရှင်းရမည်ဖြစ်သည်။ ပထမဆုံးအနေနှင့် ကျွန်ုပ်တို့အနေနှင့် လုံခြုံရေးနှင့် ဥရောပအချုပ်အခြာအာဏာအပေါ် ချဉ်းကပ်မှုကို ထည့်သွင်းစဉ်းစားရာတွင် ကျန်းမာရေးစောင့်ရှောက်မှုကိုပါ တစ်စိတ်တစ်ပိုင်းအနေနှင့် ထည့်သွင်းစဉ်းစားရမည်ဖြစ်သည်။ ဒုတိယအနေနှင့် ပြိုလဲနေသော ကျွန်ုပ်တို့၏ စီးပွားရေးများကို ပြန်လည်နာလံထူနေရန် ဆောင်ရွက်ရမည်ဖြစ်သည်၊ ကျွန်ုပ်တို့အနေနှင့် အားကောင်းသော၊ ပူးပေါင်းမှုရှိပြီး ဆန်းသစ်သော တုံ့ပြန်မှုတို့ဖြင့် ဆောင်ရွက်ရမည်ဖြစ်သည်။ တတိယအနေနှင့် ထိုကပ်ဘေးကြီးကို တိုက်ထုတ်နိုင်ရန်အတွက် တစ်ကမ္ဘာလုံးပူးပေါင်းပြီးဆောင်ရွက်သော လှုပ်ရှားမှုတွင် ဥရောပအနေနှင့် ဦးဆောင်နိုင်ရမည်ဖြစ်သည်။ တစ်ဦးတည်းခွဲထွက်၍ လုပ်ဆောင်သော နိုင်ငံများအနေနှင့် မအောင်မြင်နိုင်သည်မှာ သိသာလှပါသည်။

ကျွန်ုပ်တို့၏ အစိုးရများအနေနှင့် ကျွန်ုပ်တို့ဘေးကင်းရန်အလို့ငှာ စီးပွားရေးလည်ပတ်မှုအရှိန်များကို လျှော့ချလိုက်သည်မှာ ရက်သတ္တပတ်ပေါင်းများစွာ ရှိပြီဖြစ်သည်။ ထိုပြင်းထန်လှသော စီးပွားရေးအကျိုးသက်ရောက်မှုများသည် ကျန်းမာရေးကပ်ဘေးကြောင့်ဖြစ်လာသော အကျိုးဆက်များမဟုတ်ဘဲ ကျန်းမာရေးဘေးဖြစ်မည်စိုးသောကြောင့် တားဆီးရာမှဖြစ်ပေါ်လာခြင်းဖြစ်သည်။  သမိုင်းတွင်ထိုကဲ့သို့ တစ်ခါမှ မဖြစ်ဖူးပါ။ ထိုကဲ့သို့ တစ်ခါမှမကြုံဖူးခဲ့သော အဖြစ်အပျက်များသည် နိုင်ငံများအား အတိုင်းအတာအမျိုးမျိုးဖြင့် ထိခိုက်လျက်ရှိပြီး ဥရောပအတွင်းတွင်လည်း တင်းမာမှုများဖြစ်လာနိုင်ခြေရှိပြီး ကမ္ဘာအနှံ့တွင်လည်း ဖြစ်လာနိုင်ခြေရှိသည်။ ယနေ့ခေတ်စားနေသော စကားများမှာ ကျန်းမာရေးစနစ် အလုံအလောက်ရရှိမှု၊ ကြံ့ကြံ့ခံနိုင်မှု၊ မဟာဗျူဟာမြောက် ကိုယ်ပိုင်အုပ်ချုပ်ခွင့်၊ ဗဟုနိုင်ငံရေးပူးပေါင်းမှုနှင့် သဘာဝပတ်ဝန်းကျင်နှင့် ညီညွတ်သော ပြန်လည်ထူထောင်မှုတို့ပင်ဖြစ်သည်။

ယနေ့ခေတ်သည် Schuman ကြေညာချက်ထုတ်ပြန်ခဲ့သည့်ခေတ်နှင့် များစွာကွာခြားသွားပြီဖြစ်သည်။ နှစ်ပေါင်း ၇၀အတွင်းတွင် ကျွန်ုပ်တို့များစွာ ခရီးရောက်ခဲ့ပြီဖြစ်ကာ အခက်အခဲများစွာကိုလည်း ကျော်ဖြတ်ပြီးဖြစ်သည်။

နောင်လာမည့် နှစ်ပေါင်း ၇၀တွင် အီးယူအနေနှင့် မည်သို့ပုံစံရှိနေမည်နည်း၊ ထိုအဖြေမှာ ကျွန်ုပ်တို့ ယနေ့မည်ကဲ့သို့သော ဆုံးဖြတ်ချက်မျိုးကို ချမည်ဟူသော အချက်ပေါ်တွင် မူတည်နေပါသည်။

ဥရောပသမိုင်းတစ်လျှောက် အဆိုးအကောင်းမျိုးစုံတွင် ဖြတ်သန်းခဲ့ဖူးသော လူတစ်ယောက်အနေနှင့် ကျွန်ုပ်တို့အနေနှင့် Schuman ကဲ့သို့ ခမ်းခမ်းနားနားနှင့် ကြီးကြီးကျယ်ကျယ်တွေးခေါ်၍ အတွေးနှင့်အညီ လက်တွေ့လုပ်ဆောင်သင့်သည်ဟု ထင်ပါသည်။

Editorial Sections: