Sendinefnd ESB á Íslandi

Um Sendinefnd ESB á Íslandi

11/05/2016 - 18:01
About us - structure and organisation

Sendinefnd ESB á Íslandi

Sendinefndin hefur stöðu sendiráðs og er fulltrúi Evrópusambandsins á Íslandi. Sendinefndin er ein af um 140 sendinefndum sem ESB starfrækir víðsvegar um heiminn, í löndum sem ekki eru aðilar að ESB. Sendinefndin var opnuð á Íslandi í janúar 2010. Fram að þeim tíma hafði sendinefnd ESB í Noregi haft umsjón með samskiptum við Ísland.

Meginhlutverk sendinefndarinnar er að vera fulltrúi ESB gagnvart stjórnvöldum á Íslandi, miðla upplýsingum til höfuðstöðva ESB í Brussel um afstöðu og hagsmuni Íslands og veita almennum borgurum, félaga- og hagmunasamtökum, fjölmiðlum og öðrum, upplýsingar um ESB.

Ambassador Lucie Samcova
Ambassador Lucie Samcova

Kæru gestir,

Ég býð ykkur hjartanlega velkomin á vefsíðu sendinefndar Evrópusambandsins á Íslandi.

Í áratugi hefur Evrópusambandið og Ísland átt gott og innihaldsríkt samband sem byggist á sameiginlegum gildum og nánum tengslum íbúa okkar. Megin undirstaða þessa sambands er hinn einstaki og árangursríki samningur um Evrópska efnahagssvæðið (EES) sem tók gildi 1994, milli ESB annars vegar og Íslands, Noregs og Liechtensteins hins vegar.

Samningurinn endurspeglar gagnkvæmt traust og og skuldbindingu okkar til langs tíma ásamt því að veita svigrúm til þróunar og breytinga, þegar upp koma nýjar áskoranir. EES-samningurinn kveður á um þá víðfeðmustu samvinnu sem Evrópusambandið hefur gert á heimsvísu.

EES-samningurinn felur í sér hið svokallaða fjórfrelsi. Þetta hugtak vísar til frjáls flæðis varnings, fólks, þjónustu og fjármagns og er grundvöllur innri markaðar ESB og EES. Schengen-samstarfið veitir Íslendingum og öðrum þátttökuríkjum frelsi til að ferðast á milli landa án innra eftirlits á landamærum. Þetta auðveldar bæði Íslendingum og öðrum Evrópubúum að kynnast því sem Evrópa og Ísland hafa upp á að bjóða.

Ekki má gleyma öðrum öngum samstarfsins eins og rannsóknarvinnu, þróunarmálum, menntamálum, félagslegri stefnumótun, umhverfismálum, neytendavernd, almannavörnum, menningu og mörgu fleiru. Á hverjum degi tek ég sjálf eftir nýjum rannsóknarverkefnum, fyrirtækjum og samfélags- og menningarmálum sem sækja kraft sinn í sameiginlega Evrópu. Í þessu starfi finnst mér einna mest gefandi að sjá þennan raunverulega árangur af samvinnu okkar allra og að kynnast því frábæra fólki sem gerir þetta að veruleika.

Frá undirskrift EES samningsins hafa fleiri en 10% íbúa á Íslandi notið góðs af Erasmus-áætluninni sem styður fólk til að nema og búa í öðru landi. Nú eiga næstum 40.000 manns frá Evrópusambandsþjóðunum heima á Íslandi, sem samsvarar meira en 10% fjölda landsmanna. Þessar tölur einar og sér sýna hversu náið og mikilvægt samband Íslands og ESB er.

Ísland er einnig mikilvægur samstarfsaðili Evrópusambandsins á alþjóðavettvangi. Við erum iðulega sammála um flest utanríkismál, tökum þátt í þróunar-og mannúðarstörfum og eigum sameiginlegra hagsmuna að gæta í uppbyggingu og ýmiss konar samvinnu sem gerir okkur kleift að takast á við fjölbreyttar áskoranir sem fylgja nútímanum. Það er einbeittur sameiginlegur vilji ESB og Íslands að takast á við loftslagsbreytingar, vernda norðurslóðir og stuðla að jafnrétti kynjanna, svo eitthvað sé nefnt.

Starfsfólk sendinefndar Evrópusambandsins á Íslandi einsetur sér að viðhalda þessu farsæla sambandi. Við viljum hlusta á skoðanir Íslendinga og veita þeim nýjustu upplýsingar um Evrópusambandið og stefnumál þess. Það er von mín að fólk hafi gagn af þessari vefsíðu og finni þær upplýsingar sem það leitar að. Ég hvet ykkur einnig til að líta á Facebook og Twitter síður sendinefndarinnar, sem við uppfærum reglulega. Við hlökkum til að heyra frá ykkur.

Lucie Samcová – Hall Allen, sendiherra Evrópusambandsins á Íslandi

Languages:
Ritstjórnargreinar: