Delegation of the European Union to China

У Гродне падвялі вынікі супрацоўніцтва Еўрапейскага саюза і Беларусі ў Гродзенскай вобласці

03/10/2019 - 16:22
News stories

Вынікі апошніх гадоў падведзены на інфармацыйнай сустрэчы «Супрацоўніцтва ЕС-Беларусь: Гродзенская вобласць», якая прайшла ў Гродне ў першы дзень кастрычніка. У мерапрыемстве, у якім прынялі ўдзел прадстаўнікі грамадскіх арганізацый, органаў мясцовага кіравання, дзяржаўных устаноў, былі прадстаўлены найлепшыя практыкі, абмяркоўваліся праблемныя моманты, ідэі і магчымасці для новых праектаў.

Гродзенская вобласць — актыўны ўдзельнік праектаў, якія фінансуюцца Еўрапейскім саюзам і накіраваныя на ўстойлівае развіццё рэгіёна ў сферы транспарту і сувязі, турызму, энергаэфектыўнасці, «зялёнай» эканомікі, аховы здароўя і сацыяльнай інтэграцыі, навакольнага асяроддзя, развіцця прыватнага сектара, рэгіянальнага развіцця. Ужо 10 населеных пунктаў Гродзенскай вобласці — Навагрудак, Воранава, Дзятлава, Зэльва, Іўе, Масты, Навагрудак, Ашмяны, Слонім, Смаргонь — з'яўляюцца ўдзельнікамі еўрапейскай ініцыятывы па клімаце і энергіі «Пагадненне мэраў». Па колькасці гарадоў, якія далучыліся да ініцыятывы, Гродзенская вобласць трывала займае лідзіруючыя пазіцыі сярод іншых рэгіёнаў краіны, саступаючы толькі Віцебскай вобласці.

Берэнд дэ Гроот, кіраўнік Праграм супрацоўніцтва Прадстаўніцтва Еўрапейскага саюза ў Беларусі, адзначае рэзультатыўнасць трансгранічнага супрацоўніцтва ў Гродзенскім рэгіёне:

«Мы бачым, як намаганнямі партнёраў з розных краін вырашаюцца агульныя праблемы, суседзі натхняюць адно аднаго на новыя дасягненні. Напрыклад, у бальніцы хуткай медыцынскай дапамогі ў Гродне будзе створаны трансгранічны цэнтр для дыягностыкі і лячэння астэапарозу. У раёне Аўгустоўскага канала ідзе капітальны рамонт дарог працягласцю больш за 20 км. Камунальныя службы Гродна атрымаюць новую сучасную тэхніку, якая дапаможа эфектыўна змагацца з аварыямі і захаваць экалогію Нёмана як з беларускага, так і польскага боку. Больш за 60 трансгранічных праектаў, якія фінансуюцца Еўрапейскім саюзам на суму каля 30 млн. еўра, рэалізуюцца сёння ў Гродзенскай вобласці».

У той жа час, як адзначыў на сустрэчы менеджар праектаў Праграмы «Латвія-Літва-Беларусь» Дзмітрый Шарко, беларускія ўдзельнікі трансгранічных праектаў вобласці ахвотна выступаюць у якасці партнёраў, але ў рэдкіх выпадках бяруць на сябе функцыі вядучага бенефіцыяра.

На сустрэчы загадчыца сектара міжнароднай праектнай дзейнасці Гродзенскага ўніверсітэта Алеся Бялко прадставіла праекты па праграме «Эразмус+» і трансгранічным супрацоўніцтве, менеджар праектаў Уладзімір Кузьміч падзяліўся вынікамі праектаў Навагрудскага раёна ў сферы энергаэфектыўнасці.

Кіраўнік праекта «Спрыянне пераходу Рэспублікі Беларусь да «зялёнай» эканомікі» Вольга Чаброўская расказала пра дзейнасць сеткі «зялёных» школ і іншых праектных ініцыятыў, старшыня МГА «Экапартнёрства» Юлія Яблонская прадставіла Ініцыятыву «Пагадненне мэраў» і праект «Камарова», кіраўнік праекта «БЕЛМЕД» Алег Дубовік расказаў пра найбольш значныя ініцыятывы, рэалізаваныя ў Гродзенскай вобласці.

Аляксандр Аўдзевіч прадставіў ініцыятывы «Інклюзіўны крос-фіт» і «Інклюзіўны барыста».

На першую дэкаду кастрычніка запланаваны пачатак інфармацыйнай кампаніі «Суседзі натхняюць!», прысвечанай трансгранічнаму супрацоўніцтву. Яна падрабязна раскажа ў тым ліку і пра праекты, якія рэалізуюцца ў Гродзенскай вобласці: euprojects.by/cbc/.

Рэдакцыйныя раздзелы: