Роля Беларусі ў расійскай ваеннай агрэсіі супраць Украіны: Савет уводзіць санкцыі ў дачыненні да яшчэ 22 фізічных асоб і далейшыя абмежаванні на гандаль

02.03.2022

Савет сёння прыняў рашэнне аб увядзенні мэтавых абмежавальных мер у сувязі з дзеяннямі, якія падрываюць альбо ставяць пад пагрозу тэрытарыяльную цэласнасць, суверэнітэт і незалежнасць Украіны, у адносінах да 22 высокапастаўленых беларускіх вайскоўцаў з улікам іх ролі ў працэсах прыняцця рашэнняў і стратэгічнага планавання, якія прывялі да ўдзелу Беларусі ў расійскай агрэсіі супраць Украіны. 24 лютага на той жа падставе ў санкцыйны спіс былі ўнесены 20 беларускіх вайскоўцаў.

«Удзел Беларусі ў несправакаванай і неапраўданай ваеннай агрэсіі супраць Украіны, якая працягваецца, дорага абыдзецца. Гэтыя меры нацэлены на тых, хто садзейнічае гэтым атакам на Украіну, і абмяжоўваюць гандаль у шэрагу ключавых сектараў», – заявіў Высокі прадстаўнік па замежных справах і палітыцы бяспекі Жазэп Барэль.

Беларусь падтрымлівае расійскую ваенную агрэсію супраць Украіны, сярод іншага, дазваляючы Расіі запускаць балістычныя ракеты з беларускай тэрыторыі, ствараючы ўмовы для перапраўкі расійскіх ваеннаслужачых і цяжкага ўзбраення, танкаў і ваенных транспарцёраў, дазваляючы расійскім ваенным самалётам лятаць праз паветраную прастору Беларусі ва Украіну і захоўваючы расійскае ўзбраенне і ваенную тэхніку ў Беларусі.

Абмежавальныя меры ў сувязі з дзеяннямі, якія падрываюць альбо ставяць пад пагрозу тэрытарыяльную цэласнасць, суверэнітэт і незалежнасць Украіны, якія цяпер прымяняюцца ў агульнай складанасці да 702 фізічным і 53 юрыдычным асобам, уключаюць замарожванне актываў і забарону на прадастаўленне сродкаў пералічаным фізічным і юрыдычным асобам. У дадатак забарона на паездкі, якая прымяняецца да пералічаных асоб, перашкаджае іх уезду альбо праеду транзітам праз тэрыторыю ЕС.

Акрамя таго, у адносінах да Беларусі Савет сёння ўвёў дадатковыя абмежаванні на гандаль таварамі, якія выкарыстоўваюцца для вытворчасці тытунёвых вырабаў, на гандаль мінеральным палівам, бітумінознымі рэчывамі і газападобнымі вуглевадароднымі прадуктамі, прадуктамі з хларыду калію («калій»), вырабамі з дрэва, цэментнымі вырабамі, прадукцыяй з жалеза і сталі і гумовымі вырабамі. Таксама былі ўведзены далейшыя абмежаванні на экспарт тавараў і тэхналогій двайнога прызначэння, а таксама некаторых тавараў і тэхналогій, якія могуць садзейнічаць развіццю Беларусі ў ваеннай, тэхналагічнай, абароннай сферы і ў сферы бяспекі, а таксама абмежаванні на прадастаўленне спадарожных паслуг.

Сённяшнія рашэнні дапаўняюць пакет мер, аб'яўленых Высокім прадстаўніком пасля відэаканферэнцыі міністраў замежных спраў ЕС 27 лютага. Гэты пакет таксама ўключае ў сябе пастаўку тэхнікі і матэрыялаў для Узброеных сіл Украіны праз Еўрапейскі фонд свету, забарону на пралёт праз паветраную прастору ЕС і на доступ у аэрапорты ЕС для расійскіх перавозчыкаў усіх відаў, забарону на аперацыі з расійскім Цэнтральным банкам, адключэнне ад SWIFT для некаторых расейскіх банкаў і забарону дзяржаўным медыям Russia Today і Sputnik на вяшчанне ў ЕС.

У сваіх Заключэннях ад 24 лютага 2022 года Еўрапейскі савет самым рашучым чынам асудзіў несправакаваную і неабгрунтаваную ваенную агрэсію Расійскай Федэрацыі супраць Украіны, а таксама ўдзел у гэтай агрэсіі Беларусі. Ён таксама заклікаў да тэрміновай падрыхтоўкі і прыняцця дадатковага пакета індывідуальных і эканамічных санкцый, у тым ліку ў адносінах да Беларусі.

Адпаведныя прававыя акты, у тым ліку імёны асоб і арганізацый, што трапілі ў санкцыйны спіс, былі апублікаваны ў Афіцыйным часопісе.


Глядзіце таксама