Homofobia, bifobia dhe transfobia nuk kanë vend në Bashkimin Evropian dhe askund në botë. Siguria që askush të mos mbetet pas kërkon që të fokusohemi në luftën kundër pabarazive dhe formave të shumta e të ndërthurura të diskriminimit. Barazia, liria dhe drejtësia duhet të vlejnë për të gjithë, pavarësisht nga orientimi i tyre seksual, aktual apo i perceptuar, dhe identiteti gjinor.

Personat LGBTI në mbarë botën vazhdojnë të jenë objektiv i dhunës, diskriminimit dhe stigmatizimit. Në shumë vende, personat LGBTI janë të përjashtuar dhe të sulmuar për atë se kush janë dhe kë duan. BE-ja dënon me forcë ligjet që kriminalizojnë sjelljen konsensuale të të njëjtit seks. Ligje të tilla shkelin ligjet ndërkombëtare për të drejtat e njeriut, instrumentet ligjore rajonale, madje edhe kushtetutat kombëtare.

Në Ditën Ndërkombëtare kundër Homofobisë, Bifobisë dhe Transfobisë, si dhe çdo ditë, ne u bëjmë thirrje qeverive në mbarë botën të shfuqizojnë legjislacionin diskriminues, të ndërmarrin masa për të trajtuar dhe eliminuar krimet e urrejtjes dhe gjuhën e urrejtjes, për të parandaluar të gjitha format e dhunës kundër personave LGBTI, si dhe për të trajtuar barrierat dhe paragjykimet strukturore dhe institucionale që ende kufizojnë pjesëmarrjen e personave LGBTI në proceset vendimmarrëse dhe politike.

Pavarësisht pengesave shqetësuese dhe refuzimit global, e mirëpresim faktin që vitin e kaluar dy vende të tjera dekriminalizuan sjelljet konsensuale të të njëjtit seks dhe që disa të tjera dëshmuan përfitime gjyqësore për të drejtat e njeriut të personave LGBTI, të cilat ndihmojnë për të siguruar qartësi ligjore, siguri dhe trajtim të barabartë.

BE-ja vazhdon të punojë me partnerët për ligje dhe politika gjithëpërfshirëse. Ne mirëpresim, mbështesim dhe punojmë ngushtësisht me shoqërinë civile dhe mbrojtësit e të drejtave të njeriut të personave LGBTI, të cilët shpesh vazhdojnë të përballen me kanosje, ngacmime dhe kërcënime.

Politikat gjithëpërfshirëse bëjnë diferencën. Ne do të vazhdojmë të punojmë për të ndërtuar, jo thjesht imagjinuar, një botë në të cilën barazia lulëzon dhe çdo person mund të arrijë potencialin e vet të plotë dhe të jetojë i lirë e i barabartë.