“I inkurajoj studentët të përfitojnë nga kjo mundësi e ofruar nga Erasmus+, pasi ajo nxit jo vetëm rritjen pedagogjike dhe profesionale, por edhe zhvillimin personal”, thotë Briana Mekolli, një studente e re shqiptare që aktualisht studion në Universitetin “Hochschule Mainz” në Gjermani. Ajo beson se fitimi i përvojës ndërkombëtare në moshë të hershme i ndihmon studentët të dalin nga zonat e tyre të rehatisë dhe të rriten personalisht.

Mekolli është një nga më shumë se 10.000 studentët nga universitetet shqiptare që kanë përfunduar programe njësemestrale apo njëvjeçare në universitetet evropiane përmes Erasmus+. Bashkëmoshatarja e saj, Aleksandra Kaba, është gjithashtu pjesë e Programit të Diplomës së Dyfishtë të Erasmus-it, që jo vetëm u ofron studentëve një përvojë të pasur ndërkombëtare, por gjithashtu u mundëson atyre të fitojnë dy diploma: një Master në Biznes Ndërkombëtar nga Universiteti “Hochschule Mainz” në Gjermani dhe një diplomë nga Universiteti i Tiranës në Shqipëri.

Ndërsa Mekolli dhe Kaba janë ende në Gjermani, Antea Bega nga Shkodra ka përfunduar tashmë një semestër në Universitetin e Ekonomisë dhe Biznesit në Vjenë si pjesë e një marrëveshjeje të Erasmus-it me Universitetin “Luigj Gurakuqi”. Ajo ishte në vitin e dytë të studimeve kur aplikoi, pasi e kishte zbuluar mundësinë në faqen e internetit të universitetit të saj.

Duke e përshkruar atë si një përvojë të paharrueshme që nxit lidhjet, Bega reflekton mbi përshtypjet e saj të para dhe rezultatet si një periudhë sfidash dhe rritjeje personale. “Një nga arsyet kryesore që aplikova ishte dëshira për të përjetuar një kulturë të re dhe për të mësuar nga disa prej profesorëve më të mirë. Përveç sfidave gjuhësore, studentët takojnë njerëz të rinj, shoqërohen, përjetojnë një mjedis të ndryshëm mësimi dhe përshtaten me struktura dhe metoda të reja që formojnë zhvillimin e tyre personal”, thekson ajo.

Motoja e Erasmus+, i financuar nga Bashkimi Evropian, është: “Të ndryshojmë jetë, të hapim mendjet”. Gjatë gjithë procesit, ai ofron informacion mbi aktivitetet, ofron udhëzime dhe mbështetje për aplikantët e mundshëm, nxit bashkëpunimin ndërkombëtar përmes nismave të përbashkëta dhe rrit sinergjitë me sistemet e arsimit formal dhe tregun e punës. Duke mbështetur të rinjtë shqiptarë për të studiuar jashtë vendit, Erasmus+ fuqizon studentët, forcon aftësitë e tyre dhe rrit punësueshmërinë e tyre, duke i ndihmuar të fitojnë diploma, të përmirësojnë njohuritë e gjuhëve të huaja dhe të bëhen më konkurrues në tregun e punës.

“I inkurajoj të gjithë studentët që kërkojnë një përvojë të ndryshme dhe rritje personale të aplikojnë. Nëpërmjet një burse Erasmus+, mund të bëheni më të mirë në atë që bëni apo aspironi të jeni. Pasi përfundova semestrin në Vjenë dhe falë aftësive dhe njohurive që fitova atje, tani po punoj në tregtinë elektronike për një kompani në Shqipëri”, thotë Bega.

INFORMACION 

Programi Erasmus+ është nisma kryesore e Bashkimit Evropian që mbështet arsimin, trajnimin, rininë dhe sportin në Evropë. Ai synon të rrisë aftësitë dhe punësueshmërinë e të rinjve, të inkurajojë shkëmbimin ndërkulturor dhe të përmirësojë sistemet arsimore në gjithë Evropën dhe më gjerë. Erasmus+ promovon lëvizshmërinë, bashkëpunimin dhe inovacionin në arsim dhe trajnim, me një fokus të fortë në nxitjen e përfshirjes, diversitetit dhe mundësive të barabarta. Programi përfshin aktivitete të ndryshme, si lëvizshmërinë e studentëve për arsimin e lartë dhe trajnimin profesional, lëvizshmërinë e stafit për qëllime mësimdhënieje ose trajnimi, partneritete strategjike për bashkëpunim ndërmjet institucioneve arsimore dhe mbështetje për reformën e politikave në arsim.