This site has been archived on (2015/08/19)
19/08/2015

Fréttir

maí 11, 2015, 14:09

Evrópsk kvikmyndahátíð allan hringinn 15. - 26. maí!

Evrópustofa og Bíó Paradís efna á ný til Evrópskrar kvikmyndahátíðar í samstarfi við Films on the Fringe og bjóða brot af því besta í evrópskri kvikmyndagerð allan hringinn dagana 15. maí – 26. maí.


Danskar ofurhetjur, finnskir pönkarar, sérstakur fýlupúki, skoskir sjómenn, írskur prestur í lífshættu, Hross í Oss og París Norðursins, evrópskar kvikmyndir í hæsta gæðaflokki!

Blásið hefur verið til Evrópskra kvikmyndahátíða í Reykjavík í þrígang og nú síðast á Stockfish – Evrópskri kvikmyndahátíð 2015 sem haldin var í Bíó Paradís í febrúar síðastliðnum. Nú í annað sinn fer hátíðin allan hringinn, en farið verður á sex staði víðsvegar um land.

Tilgangur verkefnisins er að kynna og breiða út evrópska menningu, en framtakinu var stórkostlega vel tekið síðasta vor. Evrópulöndin eru stærstu samstarfsaðilar Íslands í kvikmyndagerð en fjölmargar íslenskar kvikmyndir hafa notið stuðnings MEDIA áætlunar Evrópusambandsins.

Við kynnum með stolti sex evrópskar kvikmyndir auk tveggja íslenskra kvikmynda sem bæði eru listrænar, spennandi og áhugaverðar, án endurgjalds og fyrir alla. Boðið verður upp á kvikmyndafræðslu fyrir börn, undir styrkri leiðsögn Oddnýjar Sen, kvikmyndafræðings.

Á þeim stöðum þar sem ekki er kvikmyndahús verða myndirnar sýndar með fullkomnum stafrænum sýningarbúnaði, í bestu mögulegu hljóð- og myndgæðum.

Bíó Paradís sýnir nýjar áhugaverðar kvikmyndir frá öllum heimshornum auk eldri mynda, hýsir kvikmyndahátíðir og stendur fyrir fjölbreyttum kvikmyndatengdum viðburðum. Reglulegar sýningar á perlum kvikmyndanna fyrir börn og unglinga fara fram í húsinu, þar sem markmiðið er að efla áhuga, þekkingu og menntun á kvikmyndalist.

Friður og samstarf er grunnurinn að öllu starfi Evrópusambandsins. Fátt þjónar betur þessum grunngildum heldur en flæði menningar og lista landa á milli. Menningarleg fjölbreytni í Evrópu er mikil og hana vill ESB vernda, efla og gera aðgengilega. Menningarstarf styrkir þekkingarleit og nýsköpun í samfélaginu og gegnir mikilvægu hlutverki í atvinnusköpun og stuðlar þannig að sjálfbærum hagvexti í álfunni.

Dagskrá

15. maí Egilsstaðir

16:00 ANTBOY: RAUÐA REFSINORNIN *

18:00 HROSS Í OSS

20:00 FRANK

16. maí Höfn í Hornafirði

16:00 ANTBOY: RAUÐA REFSINORNIN *

18:00 PARÍS NORÐURSINS

20:00 THE GRUMP

19. maí Akranes - Bíóhöllin

16:00 ANTBOY: RAUÐA REFSINORNIN *

18:00 THE PUNK SYNDROME *

20:00 FOR THOSE IN PERIL

21. maí Ísafjörður - Ísafjarðarbíó

16:00 ANTBOY: RAUÐA REFSINORNIN *

18:00 THE PUNK SYNDROME *

20:00 THE GRUMP

23. maí Akureyri

16:00 ANTBOY: RAUÐA REFSINORNIN *

18:00 THE PUNK SYNDROME *

20:00 CALVARY

26. maí Selfoss

16:00 ANTBOY: RAUÐA REFSINORNIN *

18:00 FOR THOSE IN PERIL

20:00 CALVARY

* Kvikmyndafræðsla verður á sýningunni